الفصل الرابع من نوفيلا لاجلك اعتزلت النساء بقلم اسماء المصرى

تركها دالفا غرفة والده يحاول مواساته ولكنه وجده يتحدث عبر هاتفه الجوال ويجاهد ليخفي ضيقه وحزنه:
-انا عارف إن الموضوع ده بالذات أنت مينفعش تتدخل فيه يا بني بس أنا معنديش غيرك يحللي مشاكلي.

أجابه فارس وهو يترجل من سيارته بعد أن فتحها له حارسه:
-تمام يا حاج هشوف الموضوع ده، بس انت عارف الاستاذ أحمد بيتعامل معايا ازاي وأنا حاولت ابعد عن الصدام معاه عشان خاطرك انت بس متقلقش وهتصرف.

انتبه زين لحديثه فوقف أمامه منتظرا تعليماته فالتفت فارس يتنهد زافرا أنفاسه بقوة:
-خد مراتك وروح لابوها للمرة المليون وحاول تصالحهم على بعض حتى لو طردكم زي كل مره، بلاش تطاوعها في مقاطعتها ﻷهلها.

رد زين مطرقا رأسه باحترام:
-اوامرك يا باشا بس حابب اقول لحضرتك إن والدتها بتكلمها من ورا ابوها وهو مش قابل اي محاوله مننا، ودعاء نفسيتها مش كويسه والحمل مأثر عليها ف…

قاطعه بفروغ صبر:
-أعمل اللي بقوله من غير نقاش، خدها انهاردة وروحوله تاني وحاولوا معاه يمكن قلبه يحن.

وافقه زين وترك رب عمله ووقف بعيدا يهاتف زوجته ويخبرها بأوامر فارس التي رفضتها الأخيرة جملة وموضوعا:
-ﻷ مش هروح، هو فارس ميعرفش إن النقض اترفض انهارده والحكم بقى نهائي؟

أكد بهمهمة بسيطة فتابعت:
-يعني بابا انهارده هيكون في أعنف حالاته ولو روحناله هيبهدلنا، ده شادي هيقضي 17 سنه في السجن تفتكر بابا هيبقى عامل ازاي.

رد بعصبية واختناق:
-خلاص يا دعاء انتي حره انا بجد زهقت من المشاكل وانا بحاول اعمل اللي عليا عشانك بس انتي حره، في الأول والآخر دول أهلك انتي.

❈-❈-❈

عاد منزل والديه وصعد الدرج عندما لم يجد أحدا بالمنزل ودلف جناحه فوجد زوجته ترضع الصغير فابتسم تلقائيا واقترب منهما وقبل رأس الرضيع وتبعه بتقبيلها قبلة شغوفه وهمس مجهدا:
-أول ما تحسي نفسك أحسن قوليلي عشان نروح بيتنا بقى أحسن بقينا بنقعد هنا اكتر ما بنقعد في بيتنا.

مسحت على وجهه براحتها الناعمة فوضع خاصته عليها يتحسس دفئها واستمع لها تخبره يومها:
-مودي انهارده حل البازل من أول مره والمدربة بتاعته مبهوره بذكائه وبتقول أنه أذكى حتى من الاطفال العاديين.

لمعت عينيه وسألها باهتمام:
-انهي بازل فيهم؟

أجابته والبسمة تتسع ﻷذنيها:
-الطوق المدرج، أنت عارف يا مازن إن مفيش طفل سليم عنده سنه عرف يحله من اول مره بس ابننا حله صح والمدربة بتقول إن ال IQ عنده أعلى من الطبيعي.