الفصل الثالث والثلاثون من رواية طمس الهوىة بقلم اسماء المصرى

الفصل الثالث والثلاثون #روضتني2 #أسماء_المصري #زعيمة_مافيا_الروايات #طمس_الهوية بحياته لم يكن ليصدق أن يتلهف ويذهب مهرولا بذلك الشكل من أجل أداء فرائضه والتي كان هو بيوما من الأيام أبعد ما يكون عن أدائها، ليس ذلك فحسب بل كان مغطا بالمعاصي والذنوب التي جعلته بيوم ما غير قادر عن الإنحراف عن ذلك الطريق العوج الذي سلكه. بدأ إحرامه وهو رافعا يده للسماء: -لبيك اللهم حجا. وقف أمام مدخل الحرم المكي ينظر أمامه للكعبة المشرفة والسعادة تغمر كل خلية بخلاياه فنسي نفسه ونسي من حوله وهرول ليبدأ الطواف وهو يصيح عاليا وبلهفة حقيقة: -لبيك اللهم لبيك، لبيك لا شريك لك لبيك. انتهى اليوم الأول من تأدية مناسك الحج وعاد للفندق الذي يقيم به هو ومن معه من أفراد حراسة وبالطبع زوجته وصديقه؛ فجلس ببهو الفندق يقرأ بمصحفه ينتظر تناول الطعام وكل من خديجة وياسمين تتسامران بهمس والأولى تقول: -حاسه اني طايره من الفرح يا ياسمين بجد شكرا عشان كنتوا سبب اني أحقق حلمي. ابتسمت لها ونظرت لزوجها المشغول بقراءة أيات من الذكر الحكيم وعقبت: -أنا مش مصدقه إن اللي قدامي ده فارس، شوفتيه كان عامل ازاي وهو رايح يطوف؟ عقب عمر على حديثها مبتسما: -محدش كان لاحق يحصله، مركب عجل في رجليه. ضحكوا فرفع وجهه عن المصحف وصدق: -صدق الله العظيم، انتوا بتتكلموا عليا؟ أومأ عمر مبتسما: -مكنتش حاسس بنفسك؟ لا أنا ولا الحراسه ولا حد كان محصلك. اتسعت بسمة فارس واستند بظهرة على المقعد: -حاسس اني مش معاكم، أنا في الجنه بجد وربنا يتقبل ويغفر لنا ذنوبنا. بدأوا تناول الطعام وفارس يؤكد لزوجته: -كلى كويس عشان بكره اليوم طويل ومتعب. أومأت متسائلة: -وقفة عرفات؟ أكد لها بحركة طفيفة من رأسه فسألته مجددا: -أنت هتفضل في الجناح التاني مع عمر مش كده؟ أومأ موضحا: -الأفضل تفضلي أنتي وخديجة مع بعض لحد يوم طواف الوداع. اتسعت عين عمر وهو يعقب عليه: -ايه السبب مش فاهم؟ مظنش انه حرام يعني. نفى فارس ووضح: -مش حرام بس الأفضل نبعد عشان ياخدوا راحتهم هم الاتنين. ❈-❈-❈ دلفت بعد طول انتظار لتلك المقابلة وصافحت مسؤول الموارد البشرية وجلست أمامه تبتسم وتعطيه السيرة الذاتية الخاصة بها؛ فنظر هو بتدقيق ورفع وجهه عن الملف وسألها بعملية: -آخر مكان اشتغلتي فيه كان الشركة العالمية؟ أومأت توضح: -ايوه كنت مساعد رئيس مجلس الإدارة المنتدب لمدة 8 شهور. تعجب قليلا وسألها والدهشة بادية على نبرته: -وليه سبتيها؟ دي شركة من أكبر الشركات ومركزك مكانش قليل كمان؟ سحبت نفسا عميقا وأجابته: -الراحة في الشغل بتخلي الموظف يدي طاقته القصوى، لكن لو في توتر طول الوقت ممكن متقدرش تكبر في مكانك. استنتج من حديثها أنها ربما عانت من الأسلوب الحاد الذي يعلمه الجميع تحت إمرة فارس الفهد الصارم، ولكن ألم تقل أن رئيس المجلس هو منتدب بمعنى أن أحدا آخر يتولى مهامه: -مين اللي ماسك الشركه في العالمية وكنتي المساعدة بتاعته؟ أجابته وهي تعلم أن تلك المقابلة هي الأخيرة بعد أن بحثت بأكثر من شركة لتجد فرصة عمل، ولكنها عانت من الجميع ممن علموا بقرابتها لعائلة الفهد حتى وإن كانت قرابة من الدرجة الثالثة أو حتى الرابعة: -يزن الفهد واحد من أصحاب الأسهم في الشركة. حرك رأسه عدة مرات متتالية وقلب بسيرتها الذاتية وعاد يكمل أسئلته العملية: -متوقعة الراتب يكون في حدود كام؟ اجابته إجابة قد تبدو نموذجية: -أظن الراتب ممكن يتحدد حسب الPosition اللي هشتغل فيه، بالنسبة لي اللي ممكن يحدد إذا كان الراتب مناسب أو ﻷ هو طبيعة العمل عشان كده محتاجه أعرف من حضرتك طبيعة العمل بالظبط وهل في أوقات ثابتة لمواعيد العمل ولا ممكن تمتد حسب حاجة العمل؟ أثناء تحدثها دلف أحدهم واستمع لجوابها فابتسم وتحدث مع موظف الموارد البشرية: -هاتلي ملف الآنسه على مكتبي. التفتت بسرعة لتنظر فتفاجئت بذلك الرجل الذي تعلمه جيدا فنهضت بسرعة تصافحه: -دكتور أيمن أزي حضرتك؟ صافحها مبتسما: -اهلا بيكي ياااا. عقبت عليه: -نرمين يا دكتور، نرمين غزال كنت في دفعة السنه اللي قبل اللي فاتت. أوما وكأنه تذكر وسحب سيرتها الذاتية وأشار لها لتتبعه: -أنا فاكرك كويس، تعالي المكتب نتكلم شويه. تبعته وجلست أمامه فنظر بسيرتها وتسائل بدهشة: -متخرجه من سنتين بس وقدرتي تشتغلي مساعد رئيس مجلس إدارة مره واحده! ابتسمت من إطراءه وردت: -الحمد لله ده بفضل ربنا. عقب عليها: -ونعم بالله، بس ايه اللي خلاكي تسيبي العالمية؟ مجددا نفس السؤال الذي تكرر بكل مقابلة عمل وكانت الإجابة عليه غير مجدية للغالبية: -أنا بصراحة اعتبرت الوقت اللي اشتغلته في العالمية هو تدريب ليا عشان لما اشتغل في مكان كبير زي الشركة هنا أكون قدها. ابتسم لجوابها ونظر لصورتها المطبوعة بسيرتها الذاتية وأسمها المرافق له وعاد للنظر لها: -أظنك تقربي لمرات فارس الفهد، اسم عيلتكم مميز جدا وسمعته كتير في كذا مناسبه؟ بللت شفتيها بتوتر وأومأت تؤكد: -أنا بنت عمها. مد راحته ناحيتها وصافحها وهو يبتسم: -عموما أهلا بيكي معانا في آل هارون للإستيراد. اتسعت بسمتها وهي تصافحه: -بجد يا دكتور؟ بجد متشكره جدا. ناولها سيرتها الذاتية وتكلم وهو يرفع سماعة الهاتف الداخلي للشركة: -هتروحي تاني لمكتب ال HR عشان تمضي أوراق التعيين وإن شاء الله تكوني إضافه لينا. خرجت من مكتبه تشعر بالسعادة تغمر خلاياها فأخيرا وجدت وظيفة بعيدة عن تلك الضغوطات التي تعرضت لها من قِبل الجميع وتحركت لمكتب مسؤول الموارد البشرية لتوقع أوراق توظيفها وغادرت سعيدة ففتحت هاتفها النقال واتصلت بتوأمتها فورا: -باركيلي يا شيري. استمعت لردها المقتضب: -مبروك، لقيتي شغل صح؟ أكدت بنفس السعادة التي تحملها بداخلها: -ايوه الحمد لله، والمرتب مش أقل أوي من العالمية الحمد لله. هزت شيرين رأسها ممتعضة: -برده نفذتي اللي في دماغك يا نرمين. زفرت بضيق: -بجد مش ممكن رد فعلك، وبتزعلي بعدين لما أكلم ياسمين ومكلمكيش. زمت شيرين شفتيها للأمام متذمرة: -قال يعني بتكلميني دلوقتي عشان سواد عيوني! كل الحكاية إن ياسمين مسافرة، المهم بس قوليلي هتبدأي شغل امتى؟ أجابتها وهي تشير براحتها لسيارة أجرة تمر من أمامها: -اكيد بعد العيد، أنتي جايه بكره ولا هتقضي الوقفه فين؟ أجابتها الأخرى: -هاجي طبعا أكيد أنتي وماما تعبتوا من جاسر وچاسمين، أهو على الأقل المربية بتاعة فارس تشيل عنكم شوية. وافقتها موضحة: -والله يبقى كتر خيرك أنا بقالي كذا يوم بنزل انتيرڤيوهات وبسيب الولاد مع ماما طول اليوم ولما بروح بتعاقبني وتخليني أسهر بيهم طول الليل عشان تنام هي. ضحكا بنهاية حديثها فبادلتها توأمتها الضحك وتمتمت: -انتي وماما بقى يتفاتلكم بلاد بصراحه، المهم قوليلي مكلمتيش ياسمين وعرفتي راجعين امتى؟ أجابتها ضاحكة بسخرية: -يعني موسم الحج كده كده بيخلص مع آخر يوم للعيد فأكيد هيرجعوا بعد العيد على طول. استمعت لشيرين وهي تتذمر: -آه يبقى ساجد هو اللي هيدبس في الدبح لوحده. تعجبت الأخرى ولكنها لم تجرؤ على سؤالها شيئا يخص تلك العائلة التي أرادت الابتعاد عنهم تماما، ولكن توأمتها لم تنتظر أكثر لتكمل تذمرها: -البيه مازن قال ايه مسافر انهارده يتفسح مع مراته عشان نفسيتها تعبانه بسبب مامتها. لم تعقب على حديثها ولكن شيرين أكملت: -بيقول لساجد أنه كل يوم يصحى على صوتها وهي بتنازع من الكوابيس وخايف عليها أوي فأخد قراره أنه يسفرها زي ما عمل وقت باباها لما اتسجن. تنفست نرمين عميقا فاستمعت لصوت توأمتها: -يا بنتي أنا بكلم نفسي؟ ردت بفروغ صبر: -شيرين من فضلك أنا لا عايزه أعرف أخبار العيلة دي ولا يهمني حد فيهم غيرك أنتي وياسمين، فلو سمحتي بلاش تكلميني عنهم ولا حتى عن اللي يخص جوزك، ممكن؟ زفرت يأنفاسها وهي ترد: -خلاص يا نرمين روحي أنتي بقيتي رخمه. ~~~ جمعت ملابسها بحقيبة السفر وفعلت المثل بملابسه ولا تزال عينيها تترقرق بالعبرات ومهما جاهدت لإخفاء ما يعتمر بصدرها تفشل بالنهاية فشلا ذريعا. دلفت دينا تحمل الصفير مدحت تهدهده: -خلصتي يا چوچو؟ التفتت بعد أن مسحت عبراتها بظهر يديها فرأت دينا بكائها الذي لم يتوقف منذ أن علمت بحقيقة مشاعر زوجها ولكن الجميع ظنوا أنه بسبب قضية والدتها: -خلاص يا طنط خلصت. تركت الصغير بفراشه واقتربت من تلك الصغيرة واحتضنتها بأمومه: -حبيبتي يا بنتي، كفايه عياط يا چوچو ده أمر ربنا وأكيد إن شاء الله هتخرج زي المحامي ما طمنك. ردت وصوتها المرتعش يظهر مدى تأثرها: -فارس مش هيسمح لها تخرج من السجن يا طنط، هو قال كده أكتر من مره. جلست على طرف الفراش تبكي وهي تخبرها: -بابي ومامي عمرهم ما حبوا فارس وده انا عرفاه ومتأكده منه وفاهمه سبب كرهه ليهم، بس كنت مفكره إن حبه لينا ممكن يخليه يتغاضى عن تصرفاتهم، بس الظاهر اني كنت غلطانه. حاولت دينا أن توضح لها الأمر: -يا چنى اللي ماتت دي كانت... قاطعتها تهدر بحدة: -كانت مربية، كانت حد بيشتغل عندنا وزي ما سامح قريبة ياسمين اللي أخوها بهدلنا بالشكل ده وكانت هي بتساعده لمجرد أنها اتبرعت لزين بجزء من الكبد بتاعها وبارك لهم على جوازهم وعمل كل اللي عمله ده قبل ما يسافر، كان المفروض يسامح مامي عشان خاطرنا على الأقل. بكت بانهيار وهي تضيف: -حضرتك شايفه حالة ميار وساهر عامله ازاي؟ متخيله إن ساهر يشيل 6 مواد في ترم واحد وهو اللي كان بيطلع من الأوائل، وميار اللي كانت أقرب حد لمامي وضعها عامل إيه بعد ما خسرت بابي وخسرت جوزها وكمان خسرت مامي؟ هو ازاي مفكرش فينا عشان ينتقم للمربية اللي عاشت معاه سنتين ولا تلاته. مسحت دينا على ظهرها وعقبت: -فارس مفيش أطيب منه والله لو بس تفهموه زي ما أنا فهماه، فارس قبل ما بيفكر في نفسه بيفكر في كل اللي حواليه، واللي متأكده منه إنه زي ما سكت لما مازن وكل لها محامي هيسكت برده لما المحامي يخرجها بالتقرير الطبي اللي قالنا عليه. ربتت على ظهرها مبتسمة: -يلا قومي خلصي اللي وراكي قبل ما مازن يرجع عشان متتزنقوش والطيارة تفوتكم، ومتقلقيش على مدحت الصغير، أنا هشيله في عنيا. هزت رأسها عدة مرات فحملت دينا الصغير مجددا وغادرت وعادت هي للبكاء والتفكير بحياتها المشتتة ومعاناتها التي لا تعرف لها حل. ❈-❈-❈ نزل بخطواته على درج الطائرة فلفحه على الفور الطقس المعتدل فسحب نفسا عميقا وأرجع يده للوراء حتى يمسك راحتها لتنزل معه ويتبعهما فريق الحرس الخاص ومعهما كل من عمر وخديجة التي تتمسك بزوجها بسعادة لا توصف. جلس أربعتهم بصالة كبار الزوار بانتظار الانتهاء من الأوراق الخاصة بهم، وأثناء جلوسهم تذكرت ياسمين تلك اللحظات التي جمعتها بزوجها أثناء السعي بين الصفا والمروة والمبيت بمنى ووقت التحلل عندما قام بمساعدها بقص أطراف شعرها وحاولت فعل المثل معه ففاجئها بحلقه لشعره تماما فصرخت به متفاجئة: -ليه كده يا فارس كنت قصه بس؟ داعب أسفل ذقنها مبتسما: -الجو هنا حر أوي بصراحه كده احسن. تذكرت أيضا اليوم الأخير بعد أن انتهوا من طواف الوداع وعادت لجناحها الذي تمكث به برفقة خديجة تلك التي تحدثت معها بالكثير من الأمور الدينية التي كانت تجهلها وكم راق لها صداقتها وأصبحتا لا تفترقان، حتى أنها قصت لها معاناتها من أجل أن تحمل صغيرتها بأحشائها مما دفع ياسمين للتفكير جديا بتلك النعمة التي لا يشعر بها سوى من افتقدها: -عارفه أنا كان نفسي يبقى عندي ولاد كتير عشان أنا اتربيت وحيدة بس فارس اكتفى بجاسر وچاسمين، بس حقيقي عايزه أحاول اقنعه نجيب أخ أو أخت كمان للولاد على الأقل حد منهم يبقى مش طفل وحيد. انتبهت من شرودها على صوت زوجها الذي همس بأذنها: -الجميل سرحان في ايه؟ ابتسمت له وهي تداعب وجهه: -الولاد وحشوني أوي. قبل راحتها وهو يؤكد: -فعلا وحشوني جدا، بس أنتي وحشتيني اكتر. غمز لها فابتسمت وأطرقت رأسها تنظر للأرض فضحك وهو يعلم أنها بعيدة كل البعد عن الخجل الذي ترسمه على وجهها فعاد يهمس: -لم نروح وتشبعي من الولاد ياريت تطلعي الجناح بتاعتنا وتجهزيلي ليله من ألف ليله وليله. حركت رأسها موافقة على حديثه وبدأوا بالتحرك للسيارات فالتفتت تحدثه: -فارس، معلش ممكن أركب مع خديجة وتخليك انت مع عمر عشان عيزاها في موضوع. جعد عمر جبينه معقبا: -مشبعتوش من بعض وانتو بقالكم أكتر من اسبوع مع بعض ليل ونهار؟ شعرت ياسمين بالحرج من حديثه فلاطفت خديجة الوضع برقتها المعهودة: -كلها مسافة الطريق يا عمر. دلفتا للسيارة والتفتت خديجة تبتسم لياسمين متسائلة: -قوليلي بقى فيه ايه؟ أجابتها بتوتر: -بصراحه عيزاكي تعلميني الرقص وﻷن انهارده مفيش مجال ولا وقت عشان نعمل ده فقولت نتفق سوا ونبدأ من بكره. ضحكت خديجة ونظرت للسائق خجلا حتى تتأكد أنه لم يستمع لحوارها، وعادت تعقب عليها عندما وجدته يركز بالقيادة: -بكره على طول؟ مستعجله ليه كده؟ أجابتها فورا: -فارس بيحب الرقص أوي وأنا حاولت كذا مره وفشلت وبصراحه كده محبش أنه يفضل يحفل عليا في الموضوع ده. زادت ضحكات خديجة الساخرة، ولكنها تحدثت ولا تزال آثار الضحك عالقة بحلقها: -بس مش ضروري الرقص يعني، أنا تقريبا معلمتهاش إلا مرة ولا اتنين من ساعة ما اتجوزت. تعجبت الأخرى رافعة حاجبها وسألتها: -في واحده بتعرف ترقص بالشكل ده ومترقصش لجوزها على الأقل مرة في الاسبوع؟ أومأت مؤكدة: -أنا بصراحه بتكسف جدا. ضحكت ياسمين وهمست لها: -بتتكسفي من جوزك؟ أومأت فتفاجئت ياسمين بردها: -إزاي يعني بتتكسفي، أظن بعد الجواز الكسوف بين الزوجين بينتهي خالص خصوصا لو بيحبوا بعض. رفعت خديجة كتفيها دلالة على عدم تحملها لخجلها: -مبقدرش بصراحه، أنا بتكسف منه حتى في أمور الجواز ومش بعرف أعمل حاجه وبسيبه هو يقود العلاقة بينا دايما ويمكن بسبب ده بحسه مش مبسوط أوي معايا بس حقيقي مش عارفه اخفف كسوفي ولا عندي خبره أعرف أتعامل. نبهتها ياسمين: -خدي بالك معظم الرجالة بتحب الست تجدد دايما عشان الملل والمفروض الراجل عارف إن مراته معندهاش خبره وهو يعلمها، يعني مين فينا كانت خبيرة؟ وكلنا اتجوزنا ومنعرفش حاجه بس الموضوع كله في ايد الراجل. أيدتها خديجة ونظرت لها بلمعة عينيها وهي تقضم أظافرها توترا وخجلا بعد أن قفزت تلك الفكرة المجنونة برأسها وقررت المضي قدما بها: -بصي يا ياسمين، عمر حاول معايا كتير بس بصراحه بتكسف جدا اسمع منه كلام من النوع ده وبحاول على أد ما أقدر اهرب من الموقف، عشان كده أنا جاتلي فكره حلوة أوي. انتظرت الأخيرة تستمع لها بانتباه: -أنا اعلمك الرقص وانتي تعلميني الأمور اياها لأني بجد خايفه أوي إن عمر يحس بالنقص معايا ويرجع للوضع اللي كان فيه قبل الجواز، ﻷني مش هستحمل اعيش معاه في الوضع ده تاني. ~~~ ذهبت لعملها باليوم الأول وهي سعيدة أن الله استمع لدعائها وحقق لها أمنيتها بالعثور على وظيفة بعيدة كل البعد عن عائلة الفهد فقد تعبت واكتفت. تحركت بتيه حتى تجد مكتبها فتقابلت مع إحدى الموظفات وسألتها: -ممكن تقوليلي فين مكتب المبيعات؟ أشارت لها لمكانه، فتحركت باتجاه المكتب واستأذنت لتجد أن رئيستها بالعمل هي سيدة جميلة وصغيرة بالسن بل وتحمل بأحشائها جنينا فابتسمت فورا وهي تعرف نفسها وتمد ساعدها: -نرمين غزال، ال Assistant بتاعة حضرتك. بادلتها المصافحة وأشارت لتجلس: -اهلا يا نرمين نورتي المكتب، اتفضلي اقعدي. جلست والبسمة على وجهها واستمعت لها تتحدث فورا بعملية: -بصي يا ستي، زي ما انتي شايفه كده أنا قربت افقص وهاخد أجازة طويلة شويه وعشان كده طلبت Assistant تشتغل معايا ﻷول مرة من ساعه ما مسكت ال Position ده. استندت براحتيها على المكتب وأكملت: -وعارفه اني مش هعرف اشتغل بنفس كفائتي بعد كده ﻷن هيكون معايا بيبي، فأعرفي انك في فتره اختبار عشان بعد ما أولد انتي اللي هتشيلي مسؤولية المكتب ده كله على كتفاك. ابتسمت وأكدت لها بثقة: -أكيد طبعا. مسحت الأخرى على بطنها وابتسمت تهتف ساخرة: -آه، شكلي حتى مش هحلق أدربك. ضحكتا سويا فعادت تخبرها: -عموما لازم تعرفي نظام الشغل عشان لو عملتها بدري أسيبلك الشغل وأنا مطمنه. هزت نرمين رأسها بانصات: -أهم حاجه لازم أعرفها أنتي متجوزه او مخطوبه؟ نفت بحركة من رأسها فأضافت متسائلة: -طيب أهلك عندهم مشكله في السفر بره؟ لم تفهم تماما مغذى سؤالها فلحقتها الأخرى توضح: -أصل شغلنا معتمد اعتماد كبير أوي على الترويج والسفر للتعاقد مع الشركات بره فعشان كده بقولك لو هيكون عندهم مشكله في السفر ألحق ألاقي حل. صفنت قليلا تفكر في ردة فعل عائلتها عندما يعلمون بذلك وهي الأعلم بوالدها الذي لم يوافق بسفرها داخل البلاد حتى من أجل الترفيه أيام دراستها، فهل يقبل الآن بسفرها خارج البلاد وبمفردها: -انا متحطتش في الموقف ده قبل كده فحقيقي مش عارفه إذا ممكن اهلي يوافقوا ولا ﻷ، بس عايزه اعرف لو رفضوا ده معناه إن مش هينفع أشتغل مش كده؟ نفت الاخرى فورا: -ﻷ طبعا دي مميزات زياده للشغل بس لو مش هتقدري مفيش مشاكل هشوف حد مكانك يسافر. انتهى عملها وعادت لمنزلها وهي تستعد لإخبار والدها بطبيعة عملها الذي علمته توا، ولكنها تفاجئت بابنة عمها جالسة تحمل صغيرتها وفارس يداعب صغيره فصاحت بتفاجئ: -ياسمين! جيتي أمتى؟ تركت الصغيرة برفقة زوجة عمها ووقفت تحتضنها: -نرمو، وحشتيني أوي. مدت راحتها لمصافحة فارس فقضم أسفل شفته وهتف: -آسف يا نرمين مبسلمش على حريم مش من محارمي. اتسعت حدقيتها وابتسمت له وهو يضيف: -وأنتي كمان المفروض متسلميش على رجاله بما انك التزمتي بالحجاب. أومأت مؤيدة رأيه وعقبت: -معاك حق، عموما حمدالله ع السلامه يا حاج فارس. غمزت لابنة عمها حتى تلحق بها لغرفتها فحملت الأخيرة الصغيرة مجددا واستأذنت الجميع ودلفت وراءها فضحكت نرمين فورا معقبة: -مش قادره أصدق إن اللي بره ده فارس، ايه الحلاقة الزيرو دي ؟ ضحكت فبادلتها ياسمين الضحك: -فاجئني لما عملها بس قمر برده. عقبت عليها الأخرى: -بصراحه وشه منور بجد ربنا يكتبهالنا. نظرت لياسمين بتفحص لما ترتديه من زي محتشم وغطاء للرأس يغطي معظم جسدها وسألتها: -أنتي خلاص كده اتحجبتي؟ أومأت فأضافت الأولى مناجية ربها: -يارب عقبال شيري هي كمان أحسن لبسها صعب أوي بجد. جلستا تحتضنا بعضهما البعض وسألتها ياسمين: -قوليلي الشغل الجديد كويس؟ أكدت بفرحة: -الحمد لله الشغل حلو أوي ومديرتي عسل كمان. ابتعدت ياسمين تنظر لها بتفاجئ: -مديرك ست؟ أومأت وبدأت باخبارها كل ما حدث باليوم حتى وصلت معها لنقطة السفر فاوقفتها ياسمين معقبة: -طبعا انتي عارفه عمي مستحيل يوافق، ده كان منشف ريقي عشان أحضر حفلات الجامعه اللي كنت بغني فيها وفي الأخر منعني خالص عنها، وأنتي لما بيكون في رحله كان بيرفض فتفكري ممكن يوافق دلوقتي؟ رفعت نرمين كتفيها بحيرة: -يمكن رأيه يتغير انا مبقتش نفس البنت الصغيرة اللي خايف عليها من الذئاب البشرية، انا بقيت ست و... قاطعتها تعلق: -متزعليش مني يا نرمو، بس المجتمع بتاعنا بيبص للمطلقة انها سلعه سهله ورخيصة و... قاطعتها نرمين تؤكد: -عارفه وعشان كده مقولتش في الشركه اني مطلقة والحمد لله إن بطاقتي لسه زي ما هي آنسه، لما ابقى اغيرها ابقى ادفع الغرامه وخلاص. ربتت ياسمين على كتفها: -إن شاء الله حبيبي تغيريها لما ربنا يفتح قلبك لحد يستاهلك. لا تعلم لماذا جاء بخيالها يزن بتلك اللحظة تحديدا عندما استمعت لابنة عمها فشردت لحظة وبالطبع لا يوجد من هو أقرب لها من ابنة عمها التي تفهمهما من عينيها فسألتها الأخيرة: -سرحتي في مين يا نرمو؟ نزلت عبراتها ولكنها لم تسمح لنفسها ولا لعبراتها بالإنهزام فمسحتها فورا: -مش قادرة أحدد أنا عايزه ايه وﻷول مرة احس اني مشتته كده، بس الحاجه الوحيدة اللي متأكده منها أني مش مستعدة ﻷي نوع من الارتباط دلوقتي خالص، بس طبعا ماما مش عطياني الفرصه وليل ونهار بتسم بدني بكلامها. مسحت على ظهرها تواسيها: -معلش يا نرمو، انتي عارفه طنط هدى بتحبك وبتخاف عليكي، هو آه اسلوبها غلط بس هو ده طبعها للأسف ومش بتفكر غير في سعادتك من وجهة نظرها، بس المهم إنك تتخطي كل الأزمات اللي مريتي بيها عشان تقدري تختاري صح. بنفس الوقت جلس فارس كل هذا الوقت يداعب صغيره ولا يحاول الدخول بنقاش مع عم زوجته فهو لا زال غاضبا منه، ولكن لم تضيع هدى الفرصة لتسأله: -مش ناويين تعملوا حفلة كده بمناسبة رجوعكم من الحج؟ ابتسمت بسمة سمجاء عندما انتبه لحديثها وسحب نفسا عميقا لاستجماع هدوءه وأجابها: -مش حفله بالمعنى الحرفي، هنعمل عزومه نتجمع فيها عشان الفترة اللي فاتت متجمعناش بسبب المشاكل الكتير اللي حصلت. أومأت بسعادة: -ايوه والله وبالمرة نشوف الڤيلا الجديدة أحسن نرمين وصفتهالي وهتجنن وأشوفها. ابتسم لها بسمة مقتضبة وسألها: -ياسمين كل ده جوه بتعمل ايه؟ أجابت بسماجة وضحكة عالية: -هتكون بتعمل ايه؟ أكيد قاعدة هي والتانية ماسكين ودان بعض يحكوا كل كبيره وصغيره حصلت لهم من ساعة ما سافرتوا، هم دول بيخبوا حاجه عن بعض؟ زفر بفروغ صبر وحدثها بجمود: -طيب من فضلك ناديها كفايه كده. أومأت وتحركت للداخل لتستدعيها فتكلم محمود أخيرا بعد أن استجمع شجاعته: -أنت عرفت إن جلسة شادي اتحددت للنطق بالحكم؟ أومأ باقتضاب: -عرفت طبعا وما شاء الله المحامي صاحبك مش موفر مجهوده عشان يتلاعب بالأدله، وأظن انك عرفت برده؟ أومأ له وحاول مداركة الأمر: -كل محامي بيحاول يكسب قضيته بالشكل اللي هو شايفه. أومأ فارس وهو زاما شفتيه وابتسم بسمة صفراء: -طبعا بس في محامي بيستخدم القانون والأدله عشان يثبت الجريمة اللي حصلت ومحامي تاني بيزور ويفتش عن الثغرات عشان يطلع المتهم بريئ، فتفكر كده ربنا هيقف مع مين؟ ولو ربنا له حكمه إن واحد زي ده ياخد براءه فاعرف اني لو هموت مش هسيبه إلا لو اخدت حقي وحق وبنتي وحق اختي وحق مراتي وحق زين منه. بنفس الوقت كانت ياسمين قد خرجت من غرفتها واستمعت لحديثهما معا فظلت تقف ناظرة لزوجها برجاء أن يتوقف عن تهديد عائلتها وقد رأت نظراته التي استوحشت بشكل لم تره من قبل. اقتربت منه تمسك ساعده براحتيها وترجوه هامسة: -يلا يا حبيبي نروح بيتنا. انتبه لضغطه القوى على أسنانه وقبضته فتنهد بعد ان فك انعقاد جبينه ونظر لها بملامح مرتخية قليلا وأومأ لها وحمل صغيره ومعه حمل حقائب الصغيرين فتحركت صوب نرمين تحمل صغيرتها وتحركت خلفه. يتبع...