الفصل الخامس والاخير من نوفيلا من اجلك اعتزلت النساء بقلم اسماء المصرى

سحبها داخل حضنه وقبلها من وجنتها:
-بعد الشر، وبعدين أعراض الكورونا حاجه تانيه انما دي أعراض حمل يا روحي مع انك أول مره تقرفي مني أنا شخصيا، قبل كده كنتي بتقرفي من الأكل او انواع روايح معينه.

سحبت الطبق وأشارت له ليسحب غيره وخرجا معا:
-أنت خلاص اتأكدت اني حامل! الوسيلة بتاعتي نسبة الحماية فيها أكتر من 90%.

وضعت ما بيدها على المائدة وجلست بجواره وهو يؤكد:
-برده أنا شاكك من فتره انك حامل وتقريبا انهارده اتأكدت، خلينا نروح نطمن أفضل.

وافقته وصعدت معه لجناحهما بعد أن تناولا الطعام ولعبا مع صغيريهما قليلا وعندما حاول أن يأخذها بحضنه نفرت منه مجددا فزفر بضيق وتوجه للمرحاض:
-هاخد شاور بالشامبو بتاعك يمكن تستحملي ريحتي عشان مش هقدر أنام بعيد عنك.

خرج بعد وقت ملتفحا بمنشفة عريضة وجلس يرتدي ملابسه وهو يخبرها:
-اعملي حسابك بكره نروح المستشفى عشان الوضع ده مينفعش يستمر كتير.

ضحكت من امتعاضه الذي بدا طفوليا واقتربت منه تقبله فأحكم ذراعيها على خصرها وعمق من قبلته وهي تحاول دفعه بعيدا ولكنه كان صلب أمامها وابتعد يتنفس بإثارة:
-الله يسامحك بجد، في حد يقرف من جوزو حبيبو برده؟

استلقى على الفراش وسحبها داخل حضنه وسألها:
-ريحتي مضيقاكي كده؟

نفت بحركة من رأسها وأغلقت عينيها وذهب بسبات عميق.

استيقظت على حركته بالجناح صباحا فهمست بخمول:
-أنت رايح الشركة؟

نفى موضحا:
-رايح المصنع أشوف النموذج بتاع الطيارة الأخير ده ع الله يتوافق عليه عشان بدأت ايأس.

تركت الفراش وتعلقت بعنقه:
-حبيبي، فارس الفهد عمره ما ييأس بس أنت سيبها على ربنا.

رد مقبلا عنقها:
-ونعم بالله، هستناكي تعدي عليا ع الساعة 4 عشان نروح للدكتورة.

بالفعل مرت عليه وذهبا سويا وقامت الطبيبة بالكشف عليها فابتسمت ونظرت لفارس الواقف بجوار شاشة الأشعة التلفزيونية يركز بصره بتلك البقعة السوداء الذي يعلمها تمام العلم وسألها مشيرا للشاشة:
-ده حمل مش كده؟

أومأت الطبيبة مؤكدة:
-حمل غالبا هيكون في 3 أسابيع.

تعجب وسألها:
-ازاي حصل مع وجود وسيله فعاله كده؟

أجابته تركز الجهاز على بطنها:
-حضرتك اللوب متحرك من مكانه أهو وده اللي سبب الحمل، طبعا وﻷن الهانم مش متابعه معايا بصفة دورية فمقدرناش نلحق الوضع.

زفر أنفاسه فسألته ياسمين بحزن:
-أنت زعلان اني حامل؟